Hugot ang pagtuo ni Kapitan Kikang nga ang tibuok komunidad angayan makadawat ug kalidad nga serbisyo gikan sa tanang nangalagad sa barangay. Tungod niini nga panglantaw, iyang giisip nga dakong misyon ang pagpalig-on sa kalidad sa serbisyo nga madalit ngadto sa katawhan sa Carmen. Gipasabot ni KapKik nga “importante kaayo nga matagaan og ensakto nga serbisyo ang atong mga ka-barangay ug mga bisita. Dili lang kay maghatag kita og ilang mga panginahanglan, kundi angay sad nga ang atong pag-alagad sa ila will make them feel valued.”
Ang FBSE usa ka values-based customer service training, nga nagtudlo sa 7Ms – Maka-Diyos, Makatao, Maka-kalikasan, Makabansa, Masayahin, May bayanihan, ug May pag-asa. Kini nagtudlo sa mga partisipante sa GUEST steps to service excellence ug sa HEART Method of service recovery, nga mobansay sa mga partisipante alang sa propesyonal nga pagdumala sa mga reklamo.
Gipasiugdahan ni Kapitan Kikang kini nga kolaborasyon uban sa DOT 10, nga naghimo sa Barangay Carmen nga unang barangay sa Region 10 nga milusad sa maong programa. Mokabat sa 250 ka-frontline workers ang ipa-ilawom sa intensive training, diin sila tudluan ug mahikat-on sa pagbuhat sa responsible ug episyente nga pangatungdanan.
Adunay 150 na ka mga trabahante ang nakaagi sa training. “Angay gyud nga apil ang mga leaders ani nga training aron magkahiusa ang tanan sa tuyo ug tumong sa pagserbisyo”, si Kapitan Kikang nagkanayon. Gipangunayan mismo ni KapKik ang pagtambong sa maong training, kauban ang iyang mga Barangay Councilors nga sila si kanhi Kapitana Lorna Uy, AJ Sabanal, Sunny Cahayag, Jun Castro, apil na usab ang mga department heads, mga zone leaders, ug ang barangay secretary nga si Aronne Tumanilak ug ang barangay treasurer na si Darlyn Waga. Aduna pa’y nahabilin nga mga konsehales ug 100 ka mga trabahante nga moapil sa katapusang duha ka umaabot nga sesyon.
Ang FBSE Training sa Barangay Carmen usa ka maayong lakang ni KapKik nga nagsulong sa pagtinabangay sa barangay.
